Төрийн өмчийн бодлого, зохицуулалтын газрын Төрийн өмчийн хяналт шалгалтын хэлтсээс зохион байгуулж буй “Орон нутгийн өмчийн газрын хяналт шалгалт хариуцсан албан хаагчдыг чадавхжуулах” сургалт Улаанбаатар хотноо 2025.01.20-22-ны өдрүүдэд “Мэдээлэл холбооны сүлжээ” ТӨХК-ийн Хурлын танхимд болж байна.
Тус нэгдсэн арга хэмжээг нээж ТӨБЗГ-ын дарга Б.Цэнгэл үг хэлсэн бөгөөд тус сургалтад ТӨБЗГ-ын Төрийн өмчийн хяналт шалгалтын хэлтсийн дарга Ц.Түвшинзаяа, тус хэлтсийн хяналт шалгалт хариуцсан албан хаагчид болон 21 аймгийн Орон нутгийн өмчийн газрын дарга нар, хяналт шалгалт хариуцсан нийт 50 гаруй албан хаагчид хамрагдаж байгаагаараа онцлогтой.
Энэхүү сургалтанд манай байгууллагын дарга Д. Батмэнд, ахлах мэргэжилтэн Б. Бат-Амгалан, мэргэжилтэн Д. Оюунпүрэв нар оролцож байна.
Сургалтын эхэнд ТӨБЗГ-ын Төрийн өмчийн хяналт шалгалтын хэлтсийн дарга Ц.Түвшинзаяа сургалтын зохион байгуулалтын талаар ерөнхий танилцуулга өгч, нэгдсэн мэдээллийг хүргэлээ. Сургалтын эхний өдөр 21 аймгийн буюу Архангай, Увс, Ховд, Хэнтий, Говь-Алтай, Дархан-Уул, Говьсүмбэр, Дорноговь, Дундговь, Баянхонгор, Өвөрхангай, Төв, Өмнөговь, Сүхбаатар, Баян-Өлгий, Сэлэнгэ, Завхан, Хөвсгөл, Булган, Орхон, Дорнод аймгуудын Орон нутгийн өмчийн газрын дарга нар энэ хугацаанд авч хэрэгжүүлж ирсэн үйл ажиллагааныхаа талаар дэлгэрэнгүй танилцуулж, харилцан мэдээлэл солилцлоо.
Дашрамд дуулгахад, Засгийн газрын Хэрэг эрхлэх газраас 21 аймгийн Засаг дарга нартай байгуулсан Гэрээний 2.3.6 дахь заалтыг хэрэгжилтийг хангах, мөн Орон нутгийн өмчийн газрын бүтэц, зохион байгуулалтад хяналт шалгалтын чиг үүрэг нэмэгдсэнтэй холбогдуулан ТӨБЗГ-ын Төрийн өмчийн хяналт шалгалтын хэлтсээс Төрийн болон Орон нутгийн тухай хуулийн 11 дүгээр зүйлийн 5 дахь хэсэгт заасныг үндэслэж дээрх сургалтыг зохион байгуулж байгааг дурдах нь зүйтэй.